АҚШ президенти Барак Обама Мичиган штатининг Флинт шаҳрида фавқулодда ҳолат эълон қилиш ҳақидаги декретга имзо чекди. Бу ҳақда «Интерфакс» хабар бермоқда.
Мазкур декрет салкам 100 минг аҳолиси бор шаҳарга ичимлик суви билан боғлиқ муаммо сабабли федерал ёрдам олиш ҳуқуқини беради. Флинтга тўғридан-тўғри 5 миллион доллар ажратилиши мумкин, аммо бунинг учун штат ҳам тахминан 1,25 миллион доллар қўшиши керак.
Флинт фуқаролари қувурларидаги ичимлик суви 2014 йил апрелида, Гурон кўлига уланган қувурлар таъмирлангани сабабли шаҳар расмийлари сув билан таъминлаш тизимини ўзгартиргандан сўнг яроқсиз ҳолга келди. Шаҳарга Флинт дарёсидан сув кела бошлади ва фуқаролар орасида ғалати ҳид ҳамда таъмдан шикоят кўпайди.
Аҳолига сувни қайнатиб ичиш ҳақида кўрсатма берилди, General Motors заводи эса жиҳозлар ишдан чиқишини айтиб, сувдан фойдаланишни тўхтатди.
Изоҳ (0)