Қатарда бошланган Осиё чемпионатининг 1-турида Ўзбекистон олимпия термаси Жанубий Кореяга 1:2 ҳисобида имкониятни бой бериб қўйди. Ўзбекистон олимпиячиларида плей-офф босқичига чиқиш имконияти қандай эканлигини баҳолаш учун «Stadion.uz» сайтида келтирилган мусобақа регламентининг умумий қоидалари билан таништириб ўтамиз.
1. Мусобақада 16 та жамоа 4 та гуруҳга бўлинган ҳолда иштирок этади. Гуруҳ босқичи ўйинлари 90 дақиқадан иборат бўлади. Ғалаба учун 3 очко, дуранг учун 1 очко берилади. Мағлубият учун очко берилмайди. Гуруҳдаги ўринлар очколар сонига қараб аниқланади.
2. Гуруҳ босқичида икки ёки ундан кўп жамоанинг очколари тенг келиб қолганда ўринлар қуйидагича аниқланади:A) Ўзаро ўйинларда кўп очко жамғарган жамоа;B) Ўзаро ўйинларда яхши тўплар фарқига эга бўлган жамоа (3 ёки 4 та жамоанинг очколари тенг бўлиб қолганда);C) Ўзаро ўйинларда кўп гол урган жамоа (3 ёки 4 та жамоанинг очколари тенг бўлиб қолганда);D) Ушбу тамойиллардан кейин ҳам 2 жамоанинг ўзаро натижалари тенг бўлса, юқоридаги тамойиллар фақат шу жамоаларга татбиқ қилинади;E) Гуруҳдаги барча ўйинларда яхши тўплар фарқига эга бўлган жамоа;F) Гуруҳдаги барча ўйинларда кўп гол урган жамоа;G) Агар фақат икки жамоанинг очколари тенг бўлса ва улар сўнгги турда майдонда бўлса, ўйиндан кейин пенальтилар серияси амалга оширилади;H) Жамоаларнинг огоҳлантиришлари ҳисоб-китоб қилинади. Кам балл жамғарган жамоага устунлик берилади (сариқ карточка учун — 1 балл; қизил карточкага айланган иккита сариқ карточка учун — 3 балл; тўғридан-тўғри қизил карточка учун — 3 балл; сариқ карточкага эга бўлган футболчига тўғридан-тўғри берилган қизил карточка учун — 4 балл);I) Қуръа.
3. Гуруҳда 1 ва 2-ўринни эгаллаган жамоалар чорак финалга чиқади, 3 ва 4-ўринни эгаллаган жамоалар мусобақани тарк этади.
4. Чорак финалда ғалаба қозонган жамоа ярим финалга чиқади. Ярим финалда ғалаба қозонган жамоалар финалда, ютқазган жамоалар 3-ўрин учун баҳсда иштирок этади.
Эслатиб ўтамиз, Ўзбекистон гуруҳдаги кейинги ўйинларини 16 январь куни Ироққа, 19 январь куни Яманга қарши ўтказади.
Изоҳ (0)