Двигателининг ишчи ҳажми 50 куб сантиметрдан каттароқ бўлган ёки энг юқори тезлиги соатига 50 км бўлган скутерлар, электр скутерлар ва квадроцикллар Ўзбекистоннинг янги таҳрирдаги Йўл-ҳаракати қоидаларида мотоциклларга тенглаштирилди, деб ёзади «Газета.uz».
«На посту» газетасига берган интервьюсида ИИВ ЙҲХББ бошлиғи Холматжон Сайдалиев кўрсатилган транспорт воситалари мотоцикллар сифатида рўйхатга олиниши, уларга давлат рақам белгилари берила бошлаши, уларни бошқариш учун эса «А» тоифасидаги ҳайдовчилик гувоҳномаси талаб этилишини айтди.
Унинг сўзларига кўра, автомобиль йўлларида тобора кўпроқ учраётган скутер, электр скутер ва квадроцикллар эгалари томонидан йўл ҳаракати қоидалари бузилиши кузатилаётгани туфайли, «мотоцикл» тушунчаси кенгайтирилган.
Эслатиб ўтамиз, олдинроқ Ўзбекистон Вазирлар Маҳкамаси Йўл ҳаракати қоидаларининг 2016 йил 1 мартдан кучга кирадиган янги таҳририни тасдиқлагани ҳақида хабар берилганди.
Изоҳ (0)