Ўзбекистон Миллий телерадиокомпанияси сухандонлар бўлимида 22 йил давомида марҳум Абдумўмин Ўтбосаров билан бирга меҳнат қилган таниқли сухандон Сурайё Эрматованинг сўзларига кўра, 1 январга ўтар кечаси вафот этган Абдумўмин Ўтбосаров ҳеч қачон саломатлигидан, жумладан, юрагидан шикоят қилган эмас.
«31 декабрь куни, соат 14:00 га яқин ишга келганимда, Абдумўмин ака бирдан ўзини ёмон ҳис қилгани, шундан кейин касалхонага олиб кетишгани ҳақида айтишди, бироқ айнан нима бўлганини барибир тушунмадик. Шундай кейин кадрлар бўлимига бордим — меҳнат таътилига чиқишим ҳақида ариза ёзишим керак эди, аризага эса айнан Абдумўмин аканинг имзоси бўлиши керак эди», — деди Сурайё Эрматова «Дарё» мухбири билан суҳбатда.
ЎзМТРКдаги сухандонлар бошлиғи сифатида фаолият олиб борган Абдумўмин Ўтбосаров, меҳнат таътиллари жадвали тузилаётгани муносабати билан, 28 декабрь куни Сурайё Эрматовага қўнғироқ қилган. Сурайё Эрматова ундан ўз имзоси қўйилган бир варақ қоғозни қолдиришни сўраган, Абдумўмин Ўтбосаров ўша куни Сурайё Эрматова ариза ёзадиган қоғозга имзо қўйиб, столида қолдирган.
«31 декабрь куни мен Абдумўмин аканинг сўнгги имзоси билан ўз аризамни кадрлар бўлимига топширганим кейин маълум бўлди», — деди Сурайё Эрматова.
Сурайё Эрматованинг хотирлашича, Абдумўмин Ўтбосаров ҳақиқий устоз, жонкуяр инсон эди, ҳар доим, ҳар вақт ўз ҳамкасбларини қўллаб-қувватлар, уларга ёрдам беришга ҳаракат қилар, қўл остидаги ходимларнинг ташвишлари ҳақида ўйлаб, қайғурарди, маслаҳат кўринишида бўлса-да кўмак беришга интиларди.
«Абдумўмин ака шунчаки тилла одам эди. У бизни худди ўз фарзандларидек кўрарди. Унинг ўлимидан сўнг биз худди етимдек қолдик», — дея қўшимча қилди Сурайё Эрматова.
Эслатиб ўтамиз, Абдумўмин Ўтбосаровнинг ҳаётдан кўз юмгани 2016 йил 1 январда маълум бўлди. Унинг ўлимига юрак хуружи сабаб бўлган.
Изоҳ (0)