Британия ҳукумат алоқалари маркази радиоэлектрон жосуслик соҳасида «душманлик кайфиятидаги» давлатлар ва террорчилик ташкилотлари томонидан ўсиб бораётган хавфларга қарши курашиш учун минглаб ходимларни махфий равишда ишга ёлламоқда. Бу ҳақда ташкилотдаги манбаларига таяниб The Times газетаси хабар берди, деб ёзади «ТАСС».
Нашр ёзишича, ҳукуматнинг ўтган йилги маърузасига кўра, Британия махсус хизмати ходимлари сони 5,7 минг кишини ташкил этади. Шунга қарамай, ҳукумат алоқалари маркази «комплекс хавфлар» билан кураш учун «қўшимча бир неча минг» кишини ишга олган. Бу айни пайтда, айниқса, АҚШ махсус хизматлари собиқ ходими Эдвард Сноуден томонидан «кўплаб махфий технологиялар» фош қилинаётган бир пайтда кўпроқ инсон ресурсларини талаб қилади.
Британиянинг ҳукумат алоқалари маркази ва АҚШнинг миллий хавфсизлик агентлиги Иккинчи жаҳон уруши даврларидан буён фаол ҳамкорлик қилади ва ахборот алмашади. 2013 йилда «Сноуден досьеси» чоп этилгач, Британия ва Америка махсус хизматлари биргаликда ўнлаб мамлакатларда юз миллионлаб кишиларни, жумладан президентлар ва етакчи сиёсатчиларни кузатгани маълум бўлган эди.
Изоҳ (0)