Дунёнинг энг бой кишилари йил бошидан буён 194 млрд доллар йўқотди

Сайёранинг энг бадавлат кишилари 2016 йилнинг биринчи савдо ҳафтасида 194 миллиард доллар йўқотди, дея хабар бермоқда «Корреспондент.net» Bloomberg Billionaires Index’га таяниб.

Бундай йўқотишларга Хитой иқтисодиётининг инқирози ва нефть нархининг тушиб кетиши сабаб бўлди. Шу ҳафта АҚШ фонд бозорида ҳам 2011 йилдан буён энг ёмони бўлди.

Энг катта йўқотишни Amazon.com асосчиси Жефф Безос бошидан кечирди, унинг давлати 5,9 миллиард долларга камайди.

Дунёдаги энг бой одам Билл Гейтс 4,5 миллиард доллардан айрилди, рўйхатда ундан кейинги ўринни эгаллаган Inditex асосчиси Амансио Ортега 3,4 миллиард доллар йўқотди.

Нашр таъкидлашича, ўтган йилнинг биринчи савдо ҳафтасида 400 нафар энг бадавлат  миллиардерларнинг умумий бойлиги 29 миллиард долларга камайган эди, бу янги йилдаги кўрсаткичдан деярли етти марта камроқдир.