Жанубий Корея ва АҚШ КХДРга нисбатан янги санкциялар жорий этишда ҳамкорлик бўйича келишиб олди
Жанубий Корея ва АҚШ президентлари КХДР ўтказган ядро синовига жавобан қўшимча санкциялар жорий этиш юзасидан ҳамкорлик ҳақида келишиб олди. Бу ҳақда 7 январь, пайшанба куни Жанубий Корея раҳбарининг матбуот хизмати маълум қилди, дея хабар беради «ТАСС».
«Пак Кин Хэ ва Барак Обама 20 дақиқали телефон мулоқоти чоғида Шимолий Корея БМТ Хавфсизлик кенгаши резолюцияларини бузгани учун шунга яраша жавоб бериши лозимлиги хусусида бир тўхтамга келди. АҚШ президенти Жанубий Корея хавфсизлигини таъминлаш учун барча керакли чораларни кўришга ваъда берди», — дейилади матбуот хизмати хабарида.
Эслатиб ўтамиз, олдинроқ БМТ бош котиби Пан Ги Мун КХДР ҳаракатларини Пхеньянга нисбатан халқаро санкциялар кучайтирилишига олиб келадиган биринчи қадам сифатида баҳолаганди.
