Ўзбекистон Миллий авиакомпанияси техник мутахассисларининг иккинчи гуруҳи Boeing-787 Dreamliner дастури бўйича қайта ўқиш учун йил бошида АҚШнинг Сиэтл шаҳрига етиб келди, дея хабар бермоқда «Газета.uz» «Ўзбекистон ҳаво йўллари» бош директори ўринбосари Геннадий Харлапга таяниб.
Миллий авиакомпания шу йил янги авлод иккита лайнерини қабул қилиб олиши керак. Авиаташувчи янги самолётларни ишга туширишга фаол равишда тайёрланмоқда.
Қайта ўқитиш бўйича мутахассислар танлов орқали саралаб олинди. Бундан ташқари, компанияда учувчилар орасида ҳам саралаш олиб борилмоқда, март ойида учувчиларни қайта тайёрлаш бошланади.
«Тошкент» аэропортида «Орзу лайнерлари» учун учта махсус тўхташ жойлари ажратилиб, жиҳозланмоқда.
Эслатиб ўтамиз, Вазирлар Маҳкамасининг 2014 йил 11 июлдаги қарорига кўра, Ўзбекистон Миллий авиакомпанияси учун иккита Boeing-787-800 Dreamliner самолётлари 2016 йил июнь ва августида етказиб берилади.
Янги самолётлар «Ўзбекистон ҳаво йўллари» самолётлари паркини янгилаш лойиҳаси доирасида сотиб олинмоқда. 2012 йил ёзида Dreamliner Dream Tour жаҳон тақдимот тури доирасида Ўзбекистонга ҳам ташриф буюрган.
Изоҳ (0)