Бухорода ўтган йили вилоят ташкилотларининг 20 нафар раҳбари алмаштирилди
2015 йилда Бухорода вилоят ташкилотларининг 20 нафар раҳбари ўзгарган. 11 нафар раҳбар ўзига юклатилган вазифани тўлақонли бажармаганлиги учун ишдан бўшатилган. Бу ҳақда вилоят ҳокими Муҳиддин Эсонов халқ депутатлари вилоят кенгаши сессиясидаги ҳисоботи чоғида маълум қилган, дея хабар беради «Газета.uz»
«Вилоятда раҳбарлик лавозимларига кадрларни тайёрлаш тизими янада такомиллаштирилди. Раҳбарлик лавозимларига кадрларни танлашда йўналишлар бўйича махсус комиссияларнинг тузилганлиги, улар таркибига депутатлар, малакали мутахассислар ва жамоат ташкилотлари вакилларининг киритилганлиги ушбу муҳим ишда ошкораликни ва адолат мезонларига қатъий риоя этилишини таъминламоқда. Раҳбар кадрларга нисбатан талабчанлик 2016 йилда ҳам қатъиятлик билан давом эттирилади», — дея таъкидлаган вилоят ҳокими.
