Баҳрайн Эрон билан авиақатновларни номаълум муддатгача тўхтатди

Баҳрайн Саудия Арабистони ортидан Эрон билан авиақатновларни бутунлай тўхтатди, деб хабар беради «ТАСС».

Баҳрайн транспорт ва телекоммуникациялар вазирлиги Эрон Ислом Республикасига авиарейсларни жўнатиш ва қабул қилиш қанча муддатга тўхтатилганига аниқлик киритмади. Вазирлик авиачипта олишга ёки брон қилишга улгурган кишилар учраган ноқулайликни минимум даражагача туширишга ваъда берди.

Эслатиб ўтамиз, Саудия Арабистони ташқи ишлар вазирлиги 2 январь куни терроризм ва фитна учун судланган 47 киши, шу жумладан, шиалар хатиби Нимр ан-Нимрга нисбатан ўлим ҳукми ижро этилганини эълон қилган эди. Шундан сўнг Теҳронда намойишчилар Саудия Арабистони элчихонасига ҳужум қилди.

Натижада Саудия Арабистони Эрон билан дипломатик алоқаларни узиб, давлатлар ўртасидаги авиақатнов ва икки томонлама савдо алоқаларини тўхтатишини, фуқароларига ушбу мамлакатга боришни ман қилган.

Шунингдек, Судан ва Баҳрайн расмийлари ҳам Эрон билан дипломатик алоқалар тўхтатилганини эълон қилди. Кейинроқ Кувайт Эрондан ўз элчисини чақириб олишга қарор қилди.