Bahrayn Eron bilan aviaqatnovlarni noma’lum muddatgacha to‘xtatdi

Bahrayn Saudiya Arabistoni ortidan Eron bilan aviaqatnovlarni butunlay to‘xtatdi, deb xabar beradi “TASS”.

Bahrayn transport va telekommunikatsiyalar vazirligi Eron Islom Respublikasiga aviareyslarni jo‘natish va qabul qilish qancha muddatga to‘xtatilganiga aniqlik kiritmadi. Vazirlik aviachipta olishga yoki bron qilishga ulgurgan kishilar uchragan noqulaylikni minimum darajagacha tushirishga va’da berdi.

Eslatib o‘tamiz, Saudiya Arabistoni tashqi ishlar vazirligi 2-yanvar kuni terrorizm va fitna uchun sudlangan 47 kishi, shu jumladan, shialar xatibi Nimr an-Nimrga nisbatan o‘lim hukmi ijro etilganini e’lon qilgan edi. Shundan so‘ng Tehronda namoyishchilar Saudiya Arabistoni elchixonasiga hujum qildi.

Natijada Saudiya Arabistoni Eron bilan diplomatik aloqalarni uzib, davlatlar o‘rtasidagi aviaqatnov va ikki tomonlama savdo aloqalarini to‘xtatishini, fuqarolariga ushbu mamlakatga borishni man qilgan.

Shuningdek, Sudan va Bahrayn rasmiylari ham Eron bilan diplomatik aloqalar to‘xtatilganini e’lon qildi. Keyinroq Kuvayt Erondan o‘z elchisini chaqirib olishga qaror qildi.