Саудия Арабистони БМТга 2 январь куни қатл этилган 47 нафар маҳкум устидан «ақлий, ирқий ёки диний мансублигидан қатъи назар, адолатли ва ҳалол суд жараёни» бўлиб ўтганини маълум қилди, деб ёзади «РБК».
Саудия Арабистонининг БМТдаги миссияси ташкилот бош котиби Пан Ги Мун Нимр ан-Нимр ва қатл этилган бошқа қатор маҳбусларга нисбатан айбловлар хусусияти ва жараённинг одиллиги юзасидан жиддий хавотир билдиргани учун «чуқур афсус» изҳор қилди.
Эслатиб ўтамиз, 2 январь куни Саудия Арабистони ташқи ишлар вазирлиги терроризм ва фитна учун судланган 47 кишига нисбатан ўлим ҳукми ижро этилганини эълон қилди. Саудия ҳукумати шиалар хатиби Нимр ан-Нимрни қатл қилгани маълум бўлганидан сўнг, Теҳронда намойишчилар Саудия Арабистони элчихонасига бостириб кирди. Шундан кейин Саудия Арабистони Эрон билан дипломатик алоқалар узилганини эълон қилди.
БМТ Инсон ҳуқуқлари бўйича олий комиссари Зайд Раад ал-Ҳусайн эса Саудия Арабистони ҳукуматини мамлакатда ўлим жазосига нисбатан мораторий қўллашга чақирди.
Изоҳ (0)