Ўзбекистон Вазирлар Маҳкамаси Йўл ҳаракати қоидаларининг 2016 йил 1 мартдан кучга кирадиган янги таҳририни тасдиқлади. Бу ҳақда, Ўзбекистон ҳукуматидаги манбага асосланиб, «Газета.uz» хабар бермоқда.
Йўл ҳаракати қоидалари (ЙҲҚ) амалдаги таҳрири 2000 йилда қабул қилинган, 2006, 2007, 2011 ва 2013 йилларда унга ўзгартишлар киритилган. Қоидаларнинг янги талқини мамлакатда сўнгги йилларда юз берган, хусусан, автотранспорт воситалари сони кўпайиши ва ахборот-коммуникация технологиялари ривожланганиши билан боғлиқ ўзгаришларни маълум маънода ўзида акс эттирган.
Йўл ҳаракати қоидаларидаги асосий ўзгаришлардан бири сифатида Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимлигига аҳоли яшаш пунктларида рухсат берилган энг юқори тезликни соатига 70 километр оширишга рухсат бериш ҳуқуқи тақдим этилганини кўрсатиш мумкин.
Маҳаллий ҳокимлик органлари, агар йўл ҳолати катта тезликда ҳаракатланиш имконини берса, Давлат йўл ҳаракати хавфсизлик хизмати билан келишган ҳолда, йўлларнинг алоҳида қисмларида ёки алоҳида турдаги транспорт воситалари учун алоҳида қатнов қаторлари (полосалари)да тегишли йўл белгиларини ўрнатган ҳолда тезлик режимини ошириши мумкин.
Бундан ташқари, турар-жой ва уларга ёндош ҳудудларда (уй-жой қурилган ҳудудлар оралиғидаги йўллар)да транспорт воситалари соатига 30 километрдан юқори тезликда ҳаракатланиши мумкин эмаслиги ЙҲҚнинг янги таҳририда белгилаб қўйилган.
Болалар гуруҳини олиб кетаётган транспорт воситаларининг ташкилий жамланмаси ҳар қандай йўлда соатига 60 километрдан юқори тезликда ҳаракатланиши тақиқланган. Бундан буён болаларни юк автомобили кузовида олиб юриш тақиқланади.
«Газета.uz»нинг қайд этишича, Ўзбекистон аҳоли яшаш пунктларида рухсат берилган тезликнинг юқорилиги бўйича жаҳон бўйича олдинги ўринларда турувчи мамлакатлардан бири ҳисобланади. Европа мамлакатларида ва кўплаб ривожланган давлатларда аҳоли яшаш пунктларининг асосий қисмида автотранспорт воситалари тезлиги соатига 50 километр билан чекланган.
Янги ЙҲҚда навигаторлар ва видеорегистраторлардан фойдаланиш масаласи ҳам тартибга солинган. Ҳужжатда ҳайдовчи транспорт воситасини бошқариш давомида автомобилни ишлаб чиқарувчи корхона томонидан автомобилга ўрнатилган теле- ва видеомониторлардан теле- ёки видеодастурларни томоша қилиш мақсадида фойдаланиши мумкин эмаслиги аниқ белгилаб қўйилган.
Теле- ва видеомониторларни салоннинг олд қисмига ўрнатиш тақиқланган, бироқ бу тақиқ навигаторлар ва видеорегистраторларга, шунингдек, ташқи кузатув видеокамераларига боғланган мониторларга дахлдор эмас — қоидага кўра, мазкур воситалар ҳайдовчи томонидан атроф-йўлни кузатишга халал бермаслиги керак.
ЙҲҚнинг янги таҳририга мувофиқ, транспорт воситаси ҳайдовчиси ҳаракатни бошлаш арафасида йўловчиларни хавфсизлик камарини тақиш ҳақида, мотоцикл ёки мопедда ҳаракатланиш вақтида эса шлемни кийиш ҳақида огоҳлантириши керак.
Куннинг қоронғу вақтида ва кўриш шароити оғир бўлган ҳолатда мажбурий тўхташни амалга оширганда, транспорт воситасини таъмирлаш мақсадида йўлнинг қатнов қисмига чиқаётган ҳайдовчи ёруғлик қайтарувчи нимча кийиб олиши шарт.
Автобуслар ва йўналишли транспорт воситалари, шунингдек, мотоцикллар ва мопедлар куннинг ёруғ вақтида ҳам яқинни ёритувчи чироқларини ёқиб юришлари керак.
Қоидаларга ЙҲҚнинг бузилишини махсус автоматлаштирилган техник воситалар ёрдамида фото- ва видеофиксация қилиниши ҳақидаги тушунча ҳам киритилган.
Ички ишлар вазирлигидан «Газета.uz»га маълум қилишларича, Йўл ҳаракати қоидаларининг янги таҳрири вазирлик сайтида эълон қилинади ва барча ўзгаришлар ҳақида ОАВ орқали батафсил ахборот берилади. Бундан ташқари, кейинги бир ой давомида янги таҳрирдаги ЙҲҚ матнли кўринишда чиқарилиши керак.
Изоҳ (0)