Юқори технологияли компаниялар 2015 йилда АҚШда ва дунёда капиталлашуви бўйича энг йирик компаниялар рўйхатида етакчилигини янада мустаҳкамлади: Apple рейтингдаги биринчиликни сақлаб қолди, Alphabet (Google ва Android холдинги) эса ўртадаги тавофутни қисқартириб, илк бор иккинчи ўринга кўтарилди. Бу ҳақда «Интерфакс» хабар бермоқда.
Apple 2015 йилни 640 миллиард доллар капиталлашув билан бошлади, баҳорда бу кўрсаткич 750 миллиард долларгача кўтарилди, бироқ йил якунига келиб, жаҳондаги энг қиммат компаниянинг бозор нархи iPhone смартфонларига талаб борасидаги хавотир сабаб 600 миллиард доллардан пастга тушди. Alphabet эса бу йил салмоқли қадам ташлаб, капиталлашувини 45 фоизга оширди ва 530 миллиард долларга етказди. Microsoft ҳам кейинги ойларда сезиларли силжишга эришиб, салкам 450 миллиард доллар капиталлашув билан учинчи ўринга кўтарилиб олди.
Ёқилғи-энергетика компаниялари нефть нархи кескин пасайганидан жабр чекди. Exxon Mobil ўн йил давомида илк бор рейтингда на биринчи ва на иккинчи ўринни эгаллади: компания йил давомида Уоррен Баффетнинг Berkshire Hathaway холдинги билан 4-ўрин учун курашиб келди. Охирги марта Exxon Mobil 1999 йилда 5-ўринда қайд этилганди.
Олтинчи ўринга йил давомида икки баробардан зиёд қимматлаган Amazon (315 миллиард доллар) кўтарилди. Шунингдек, АҚШнинг капиталлашув бўйича энг йирик компаниялари қаторидан Facebook, General Electric, Johnson & Johnson ва Wells Fargo банки ҳам ўрин олган.
Изоҳ (0)