АҚШ ҳарбийларининг Ироқнинг Киркук провинцияси ҳудудига жойлаштирилгани ҳақидаги маълумотларни Ироқ ва Сурияда ИШИДга қарши курашаётган АҚШ қўшинларининг расмий вакили, полковник Стив Уоррен рад этди. Бу ҳақда «ТАСС» хабар бермоқда.
«Бу маълумот уйдирма. Менимча, бундай гаплар АҚШ бошчилигидаги коалиция ва Ироқ ҳукумати ўртасига нифоқ солмоқчи бўлган кимсалар томонидан тарқатилади. Агар биз ўз кучларимизни қаергадир жўнатмоқчи ёки операция ўтказмоқчи бўлсак, буни Ироқ ҳукумати билан келишиб олгандан кейингина амалга оширамиз», — деди Стив Уоррен.
Полковник Уоррен Эр-Рамади шаҳрининг Ироқ қуролли кучлари томонидан қутқарилишига ҳам тўхталиб ўтди. Унинг сўзларига кўра, айни вақтда шаҳарда неча киши қолганлиги тўғрисида аниқ рақамлар йўқ.
«400 га яқин аҳоли бошпана излаб, Эр-Рамади муниципалитетига келди ва Ироқ хавфсизлик кучлари уларни қабул қилди», — деди Уоррен. Унинг қўшимча қилишича, Ироқ ҳукумати қўшинлари тирик қолган ва жангарилардан беркиниб олган шаҳар аҳолисини излашда давом этади.
Эслатиб ўтамиз, 28 декабрь, душанба куни Ироқ армияси Эр-Рамади шаҳри ИШИД жангариларидан озод этилганини эълон қилди.
Изоҳ (0)