Yuqori texnologiyali kompaniyalar 2015-yilda AQShda va dunyoda kapitallashuvi bo‘yicha eng yirik kompaniyalar ro‘yxatida yetakchiligini yanada mustahkamladi: Apple reytingdagi birinchilikni saqlab qoldi, Alphabet (Google va Android xoldingi) esa o‘rtadagi tavofutni qisqartirib, ilk bor ikkinchi o‘ringa ko‘tarildi. Bu haqda “Interfaks” xabar bermoqda.
Apple 2015-yilni 640 milliard dollar kapitallashuv bilan boshladi, bahorda bu ko‘rsatkich 750 milliard dollargacha ko‘tarildi, biroq yil yakuniga kelib, jahondagi eng qimmat kompaniyaning bozor narxi iPhone smartfonlariga talab borasidagi xavotir sabab 600 milliard dollardan pastga tushdi. Alphabet esa bu yil salmoqli qadam tashlab, kapitallashuvini 45 foizga oshirdi va 530 milliard dollarga yetkazdi. Microsoft ham keyingi oylarda sezilarli siljishga erishib, salkam 450 milliard dollar kapitallashuv bilan uchinchi o‘ringa ko‘tarilib oldi.
Yoqilg‘i-energetika kompaniyalari neft narxi keskin pasayganidan jabr chekdi. Exxon Mobil o‘n yil davomida ilk bor reytingda na birinchi va na ikkinchi o‘rinni egalladi: kompaniya yil davomida Uorren Baffetning Berkshire Hathaway xoldingi bilan 4-o‘rin uchun kurashib keldi. Oxirgi marta Exxon Mobil 1999-yilda 5-o‘rinda qayd etilgandi.
Oltinchi o‘ringa yil davomida ikki barobardan ziyod qimmatlagan Amazon (315 milliard dollar) ko‘tarildi. Shuningdek, AQShning kapitallashuv bo‘yicha eng yirik kompaniyalari qatoridan Facebook, General Electric, Johnson & Johnson va Wells Fargo banki ham o‘rin olgan.
Izoh (0)