Невададаги янги фабрикасини мутлақо махфий равишда қураётган Tesla компанияси британиялик таниқли фотосуратчи Жеймс Липменга корхонада олинган бир неча суратларни чоп этишга рухсат берди. Бу ҳақда, Business Insider’га асосланиб, TJournal хабар бермоқда.
«Гигафабрика 1»нинг қурилиши 2020 йилда якунланиши керак. Қурилиш ишлари тугаганидан сўнг, у ўз ҳажми бўйича жаҳондаги энг катта иккинчи иншоотга айланади — унинг майдони Нью-Йоркдаги Марказий хиёбондан уч баробар катта. Биринчи ўрин эса ҳамон Boeing’нинг АҚШдаги фабрикасига тегишли.
Компания яқин вақтга қадар ўзининг энг асосий фабрикасини суратга олишни қатъий тақиқлаб келаётган эди. Октябрь ойи ўрталарида Reno Gazette-Journal газетасининг икки мухбири Tesla’га тегишли ҳудудга кириб, суратга олиш вақтида қўлга тушгани билан боғлиқ ҳодиса шов-шув бўлиб кетган эди. Қўлга олиш жараёнида журналистлар компания ходимларидан бирига жароҳат етказган, кейин эса ўз машинасида автогигантинг икки ходими ўтирган ган квадротциклга бориб урилган.
Афтидан, реклама фотосуратчиси ҳисобланган Жеймс Лимпен янги заводни суратга олиш ва суратларни эълон қилиш учун Tesla’дан рухсат ололган илк фотосуратчи бўлди. У Instagram’даги ўз саҳифасига фабрика меҳмонлари учун мўлжалланган холл — оқ ва қора диванлар билан жиҳозланган оппоқ иншоот суратини жойлаштирди.
Ташқари томонда Tesla’нинг автомобилни қувватлантириш шохобчаси жойлашган. Компания ҳудудидаги ички кўчага «Электр авенюси» деб ном берилган.
Липменнинг таъкидлашича, бутун фабрикада фақат қайта тикланувчи энергия манбаларидан фойдаланилади.
Business Insider’нинг ёзишича, Липменнинг суратларига қараб, у компания учун фотосессия уюштирган, деб тахмин қилиш мумкин. Шундай бўлса, яқин вақт ичида объектдан олинган яна бошқа, кўплаб суратлар пайдо бўлиши эҳтимоли йўқ эмас.
Бунгача «Гигафабрика 1»ни фақат ҳаводан — дронлар ёрдамида суратга олиш имкони бўлган. Хусусан, июнь ойида олинган видеода компания бино томига улкан қуёш батареяларини ўрнатишни бошлаганини кўриш мумкин эди.
https://www.youtube.com/watch?v=7p64V9kawqw
Изоҳ (0)