Nevadadagi yangi fabrikasini mutlaqo maxfiy ravishda qurayotgan Tesla kompaniyasi britaniyalik taniqli fotosuratchi Jeyms Lipmenga korxonada olingan bir necha suratlarni chop etishga ruxsat berdi. Bu haqda, Business Insider’ga asoslanib, TJournal xabar bermoqda.
“Gigafabrika 1”ning qurilishi 2020-yilda yakunlanishi kerak. Qurilish ishlari tugaganidan so‘ng, u o‘z hajmi bo‘yicha jahondagi eng katta ikkinchi inshootga aylanadi — uning maydoni Nyu-Yorkdagi Markaziy xiyobondan uch barobar katta. Birinchi o‘rin esa hamon Boeing’ning AQShdagi fabrikasiga tegishli.
Kompaniya yaqin vaqtga qadar o‘zining eng asosiy fabrikasini suratga olishni qat’iy taqiqlab kelayotgan edi. Oktabr oyi o‘rtalarida Reno Gazette-Journal gazetasining ikki muxbiri Tesla’ga tegishli hududga kirib, suratga olish vaqtida qo‘lga tushgani bilan bog‘liq hodisa shov-shuv bo‘lib ketgan edi. Qo‘lga olish jarayonida jurnalistlar kompaniya xodimlaridan biriga jarohat yetkazgan, keyin esa o‘z mashinasida avtogiganting ikki xodimi o‘tirgan gan kvadrotsiklga borib urilgan.
Aftidan, reklama fotosuratchisi hisoblangan Jeyms Limpen yangi zavodni suratga olish va suratlarni e’lon qilish uchun Tesla’dan ruxsat ololgan ilk fotosuratchi bo‘ldi. U Instagram’dagi o‘z sahifasiga fabrika mehmonlari uchun mo‘ljallangan xoll — oq va qora divanlar bilan jihozlangan oppoq inshoot suratini joylashtirdi.
Tashqari tomonda Tesla’ning avtomobilni quvvatlantirish shoxobchasi joylashgan. Kompaniya hududidagi ichki ko‘chaga “Elektr avenyusi” deb nom berilgan.
Lipmenning ta’kidlashicha, butun fabrikada faqat qayta tiklanuvchi energiya manbalaridan foydalaniladi.
Business Insider’ning yozishicha, Lipmenning suratlariga qarab, u kompaniya uchun fotosessiya uyushtirgan, deb taxmin qilish mumkin. Shunday bo‘lsa, yaqin vaqt ichida obyektdan olingan yana boshqa, ko‘plab suratlar paydo bo‘lishi ehtimoli yo‘q emas.
Bungacha “Gigafabrika 1”ni faqat havodan — dronlar yordamida suratga olish imkoni bo‘lgan. Xususan, iyun oyida olingan videoda kompaniya bino tomiga ulkan quyosh batareyalarini o‘rnatishni boshlaganini ko‘rish mumkin edi.
https://www.youtube.com/watch?v=7p64V9kawqw
Izoh (0)