Миср суди мамлакат президенти Абдулфаттоҳ ас-Сисий акс этган карикатурани Facebook’га жойлаштирган 22 ёшли мисрликни уч йилга озодликдан маҳрум этиш ҳақида ҳукм чиқарди. Бу ҳақда «РБК» хабар бермоқда.
Амр Ноэн томонидан ижтимоий тармоққа чиқарилган карикатурада Миср президенти Микки Маус қулоқлари билан бирга акс этган.
Иши ҳарбий судга оширилиши арафасида, ҳуқуқшунослик йўналиши бўйича таълим олаётган талаба Ноэннинг муддатли ҳарбий хизматни якунлашига атиги беш кун қолганди.
Ҳарбий прокурор 22 август куни унга нисбатан айблов хулосасини эълон қилган. Орадан тўрт ой ўтар-ўтмас, Ноэн қуролли кучлар ҳарбий хизматчиси учун нолойиқ ҳаракати учун уч йилга озодликдан маҳрум этилди.
Daily Mail’нинг ёзишича, ҳарбий терговчилар йигитни «амалдаги ҳокимиятга қарши қаратилган фикрлар»да ҳам айблаган. Терговчиларнинг сўзларига кўра, талаба армиядаги оғир шароитлардан нолиган.
Ҳозирги вақтда Амр Ноэн Искандария яқинидаги Бурж ал-Араб қамоқхонасида сақланмоқда. Қайд этишларича, мамлакатнинг ағдарилган президенти Муҳаммад Мурсий ҳам шу ерда жазони ўтамоқда.
Изоҳ (0)