Reuters Владимир Путиннинг кенжа қизи деб атайдиган Катерина Тихонова ва Россия президентининг қадрдон дўсти Николай Шамаловнинг ўғли Кирилл Шамалов 2013 йил февралида Санкт-Петербург яқинидаги «Игора» тоғ-чанғи курортида тўй қилган. Бу ҳақда агентликка беш нафар манба маълум қилган, деб ёзади «Ведомости». «Игора» Путиннинг бошқа қадрдон дўсти Юрий Ковальчук ва Кипр оффшорига тегишли.
Улар, шунингдек, тўй қандай ўтганини ҳам гапириб берди. Тўйга 100 га яқин киши келган. Тантана суратлари ижтимоий тармоқларда пайдо бўлмаслиги учун меҳмонлардан мобил телефонларини олиб қўйишган. Тўйда хизмат қилган сураткашга Тихонованинг расмини кўрсатишганида, у келин шу қиз бўлганини эътироф этди. Курорт ходимларидан бири уларни соқчилар тантана бўлаётган жойга яқинлашишга қўймагани, бироқ улар бу Путиннинг қизининг тўйи эканлигини билганини айтди.
Путин эса Тихонова қизи эканлигини на рад этади, на тан олади. 17 декабрь кунги катта матбуот анжуманида «РБК» мухбирининг «‘Иннопрактика’ жамғармаси раҳбари Катерина Тихонова сизнинг қизингизми?» — маъносидаги дангал саволига президент жавоб бермади. У ўз қизлари ҳақида хавфсизлик каби нуқтаи назарлардан гапириб ўтирмаслигини таъкидлади.
«Улар бизнес ва сиёсат билан шуғулланмайди. Улар ҳеч қаерга бурнини суқмайди», — деди Путин.
2015 йил январида Reuters агентлигининг манбалари анонимлик шарти остида, Москва давлат университети билан ишлайдиган «Миллий интеллектуал тараққиёт» жамғармаси раҳбари Катерина Тихонова Россия президенти Владимир Путиннинг қизи эканлигини тасдиқлаган эди.
Путиннинг иккинчи қизи — Мария Фассен, Reuters маълумотларига кўра, Москвадаги Эндокринология илмий марказида ишлайди.
Изоҳ (0)