Жанубий Кореянинг Samsung компанияси Американинг Apple компанияси iPhone смартфонидан нусха кўчирганлик иши бўйича АҚШ Олий судига навбатдаги апелляция шикоятини берди. Бу ҳақда «Hi-tech.mail.ru» хабар беради.
Декабрь ойи бошида Samsung iPhone дизайни патенти ва смартфонда қўлланилган технологияларга патентни бузгани учун ярим миллиард доллар товон пули тўлашга рози бўлган эди. Бироқ компания қарши даъво билан чиқиш ҳуқуқини ўзида сақлаб қолган эди.
Samsung ўз аризасида «патентланган бурчаклари айлана олд панел ва ишчи столидаги ёрлиқлар белгиси» учун товон пули тўлаш ноҳақлик бўлишини маълум қилди. Компаниянинг таъкидлашича, сўз қошиқ ёки гилам ҳақида юритилганда, дизайн патенти ҳал қилувчи масала бўлиши мумкин. Бироқ смартфон каби кўп функцияга эга қурилма билан боғлиқ ҳолатда ташқи кўриниш «унинг фавқулодда функциялари билан умуман боғлиқ эмас», деб ҳисобламоқда компания.
Бу Корея компаниясининг чўзилиб кетган патент урушини ўз фойдасига ҳал қилишдаги сўнгги уринишидир.
Изоҳ (0)