Google 2015 йилда энг кўп қидирилган мавзулар рейтингини эълон қилди

Google компанияси қидирув тизими версиясига кўра ўтаётган йилда дунёда содир бўлган энг муҳим воқеалар ва кўп берилган саволларга бағишланган «Қидирувдаги йил» тўпламини ўн бешинчи бор тақдим этди. Бу ҳақда TJournal хабар берди.

Йилнинг энг кўп муҳокама этилган янгиликлари оммавий офатлар ва спорт мусобақалари бўлган. Париждаги терактлардан сўнг сўровлар сони 897 миллиондан ошиб кетган. «Непалга қандай ёрдам бериш мумкин?» саволи эса Катмандуни деярли буткул вайрон қилган зилзиладан сўнг энг кўп берилгани қайд этилган (жами Непал бўйича 85 миллиондан ошиқ сўров бўлган). Крикет бўйича жаҳон чемпионати 320 миллиондан зиёд қидирилган.

Оскар мукофотини топшириш маросими, ҳаётдан кўз юмган юлдузлар билан хайрлашув, регби бўйича ЖЧ ва аёллар ўртасида футбол бўйича ЖЧ, шунингдек, Елизавета II энг кўп ҳукм сурган қироличага айлангани аҳамиятли мавзулар сирасига кирган.

Google йилнинг асосий трендларини ҳам белгилаб ўтди. Улар қаторидан оқ-тилла ёки қора-кўк либос ранги ҳақидаги баҳслар (70 миллиондан зиёд сўров) ва «Юлдузлар жанги: Кучнинг уйғониши» фильми ўрин олган (трейлер 155 миллион мартадан кўп қидирилган).

Эслатиб ўтамиз, олдинроқ Facebook 2015 йилда энг кўп муҳокама этилган мавзулар рейтингини эълон қилган эди.