Бағдоддаги шиалар масжиди яқинида юз берган портлаш оқибатида 11 киши ҳалок бўлди
9 декабрь, чоршанба куни номаълум худкуш Ироқ пойтахтининг шарқида жойлашган шиалар масжиди ёнида ўзини портлатиб юборганлиги оқибатида 11 киши ҳалок бўлди ва яна 20 киши тан жароҳати олди. Бу ҳақда «Синьхуа» берган маълумотларга асосан «РИА Новости» хабар қилмоқда.
Худкуш портловчи мосламани Аҳл ал-Байт масжидига кираверишда маҳаллий вақт билан соат 12:00 да ишга туширди.
Хабар қилинишича, қурбонлар сони кўпайиши мумкин. Воқеа жойида шифокорлар ва полиция ходимлари ишламоқда.
Ҳозирча, ҳудудда ҳаракатланувчи радикал гуруҳларнинг ҳеч бири юз берган портлашни ўз зиммасига олмаган.
Мамлакатнинг бир қисмини эгаллаб олган ИШИД радикал гуруҳининг ҳаракатлари оқибатида Ироқдаги вазият таранглигича қолмоқда. Жангарилар, асосан тинч аҳолининг қурбон бўлишига олиб келаётган ҳужумлар уюштириб, терактлар содир этмоқда.
