«Яндекс» 2015 йилдаги энг оммабоп сўровларни эълон қилди

Россиянинг «Яндекс» қидирув хизмати қидирув сўровларини таҳлил қилиб чиқиб, 2015 йилда тизим фойдаланувчилари орасида энг катта қизиқишни келтириб чиқарган асосий ҳодиса ва воқеалар, шунингдек, кишиларни эълон қилди.

Компания оммабоп сўровларни 11 та йўналишга ажратди, булар мамлакат ва дунёдаги воқеалар, эркаклар, аёллар, премьералар, интернет, спорт, фильмлар, Россия сериаллари, хорижий сериаллар, телелойиҳалар ва ўйинлар.

Мамлакат ва дунёдаги ҳодисалар орасида Россия самолётининг Мисрга қулаши сўровлар бўйича етакчилик қилди. Ундан кейинги ўринларни Суриядаги уруш ва ИШИД ҳамда Ғалабанинг 70 йиллигига бағишланган парад эгаллади.

«Эркаклар» категориясида юқори учликка шу йил ҳаётдан кўз юмган сиёсатчи Борис Немцов ва мусиқачи Батирхан Шукенов, шунингдек, Comedy Club резиденти Тимур Батрудинов кирди. Аёллар орасида исм-шарифи «Яндекс»да энг кўп қидирилганлар марҳум қўшиқчи Жанна Фриске, «Евровидение—2015» да Россия номидан қатнашган Полина Гагарина ва Немцов ўлдирилган тунда унга ҳамроҳлик қилган украиналик модель Анна Дурицкая бўлди.

Шу йилги премьералардан Samsung Galaxy S6 смартфони ва Windows 10 операцион тизими тақдимотлари фойдаланувчиларни энг кўп қизиқтирган.

Фильмлар ичида сўровлар бўйича  «Кулрангнинг 50 та туси», «Қасоскорлар»нинг сўнгги қисми ва еттинчи «Форсаж» етакчилик қилди.