Миллий матбуот марказида Ўзбекистон Касаба уюшмалари федерацияси томонидан «Кексаларни эъзозлаш йили» Давлат дастури ижроси доирасида амалга оширилган ишларга бағишланган матбуот анжумани бўлиб ўтди. Бу ҳақда ЎзА хабар беради.
«Кексаларни эъзозлаш йили» Давлат дастурига мувофиқ жамоат ташкилоти кексалар, ногиронлар ва аҳолининг бошқа тоифалари учун ижтимоий хизматларга оид қонун ва бошқа қатор ҳужжатлар лойиҳаларига таклифлар киритишда фаол қатнашди.
Дастур доирасида жамоат ташкилотининг ишонч телефони орқали 150 дан ортиқ фахрийга бепул ҳуқуқий маслаҳат берилди. Хотира ва қадрлаш куни муносабати билан турли вазирлик ва идораларда меҳнат қилган 1941—1945 йиллардаги уруш фахрийларига 300 минг сўмдан пул мукофотлари топширилди.
Эҳтиёжманд ва ёлғиз кексаларга озиқ-овқат маҳсулотлари, дори-дармонлар ажратиш, уй-жойларини таъмирлаш, коммунал тўловларига кўмаклашиш мақсадида 7 миллиард 750 миллион сўмга яқин моддий ёрдам кўрсатилди. Кам таъминланган фахрийларга кир ювиш машинаси, микротўлқинли печь ва бошқа электр-рўзғор жиҳозлари туҳфа этилди.
Тизимдаги 15 сиҳатгоҳда катта ҳажмдаги қурилиш-реконструкция ишлари бажарилди. Жорий йилнинг 1 декабригача Касаба уюшмалари федерацияси ҳамда вазирлик ва идораларга қарашли 36 санаторий-соғломлаштириш масканида қарийб 11,5 минг отахон ва онахон соғломлаштирилди.
Тизимдаги сиҳатгоҳларда кексаларнинг бепул соғломлаштирилишига жиддий эътибор қаратилди. Бемор, имконияти чекланган ёши улуғ кишилар ногиронлик аравачаси, танометр, эшитиш мосламаси, глюкометрлар билан таъминланди.
Дастур доирасида отахон ва онахонларнинг Ўзбекистоннинг қадимий шаҳарлари, маданият ва маърифат масканларига саёҳатлари ташкил этилди. Давлат дастури ижроси учун Ўзбекистон Касаба уюшмалари федерацияси кенгаши томонидан 73 миллиард сўм маблағ йўналтирилгани кексаларга ҳурмат кўрсатиш мазкур жамоат ташкилоти фаолиятида устувор ўрин тутганини кўрсатади.
Изоҳ (0)