Онаси саккизинчи қаватдаги деразадан акаси билан бирга ташлаб юборган иккинчи бола ҳам Иркутск шифохонасида вафот этди. Бу ҳақда «РБК» хабар беради.
«Тўрт ёшда бўлган иккинчи бола Ивано-Матрёнинск болалар клиник шифохонасида вафот этди», ― дея хабар берди маҳаллий ҳукумат матбуот хизмати.
32 ёшли аёлнинг ўз уйининг деразасидан фарзандларини ташлаб юбориб, кейин ўзи ҳам сакраганлиги тўғрисидаги хабарни Ички ишлар вазирлигининг ҳудудий бошқармаси 27 ноябрда маълум қилган.
Аёл воқеа содир бўлган жойда вафот этди. Унинг болалари зудлик билан шифохонага ётқизилган бўлишига қарамасдан, тез орада улардан бири реанимацияда вафот этди.
Россия тергов қўмитаси мазкур ҳолат бўйича жиноят иши қўзғатган. Идоранинг таъкидлашича, оила тинч-хотиржам ҳисобланган. Шунингдек, аёлнинг психоневрологик клиникада рўйхатда турмаганлиги ва унинг ақлий нуқсони бўлмаганлиги маълум қилинмоқда.
Изоҳ (0)