Жанубий Дакота штатида жойлашган ва деярли бутун аҳолиси тарк этиб кетган Суэтт номли кичик шаҳарча АҚШда сотувга қўйилди. Бу ҳақда «ТАСС» хабар беради.
Кўчмас мулк савдолари бўйича махсус вакил Стэйси Монтгомерининг айтишича, уни 250 минг АҚШ долларига харид қилиш мумкин.
Суэтт шаҳри Рапид Ситидан 160 километр жануби-шарқда жойлашган бўлиб, кичик майхона, бир қаватли уй, бир нечта хўжалик қурилмалари, шу жумладан, собиқ шиномонтаж устахонаси ва артезиан қудуғидан иборат. Чексиз дашт сарҳадларида йўқолиб кетган ва шаҳар мақомига эга бўлган ушбу жойнинг ҳудуди тахминан 0,02 квадрат километрни ташкил этади. У ерга асфальтлаштирилган автомобиль йўли олиб боради.
1940 йилларда Суэтт аҳолиси ўзининг энг юқори кўрсаткичига етиб, тахминан 40 кишини ташкил этган. Ўша вақтда у ерда почта ва дўкон ҳам бўлган. Ҳозирги кунга келиб, шаҳарда яшовчи аҳолидан фақат икки киши – шаҳар эгаси Лэнс Бенсон ва унинг турмуш ўртоғи қолган. Улар билан бирга бир кучук ҳам яшайди. 1998 йилда шаҳарни сотиб олган Бенсон кейинчалик ажрашиш жараёни талабига мувофиқ ундан воз кечишга мажбур бўлди, бироқ 2012 йилга келиб Суэттни яна сотиб олди.
Изоҳ (0)