Нурсултон Назарбоев нима учун Қозоғистонда тикилган костюм кийишини тушунтириб берди

Қозоғистон президенти Нурсултон Назарбоев нима учун Қозоғистонда тикилган костюм кийишини тушунтирди. Бу ҳақда «Zakon.kz» хабар бермоқда.

«Нима учун кичик бир фабрика томонидан ишлаб чиқарилган костюмни кийишни бошладим? Чунки улар энди иш бошлаяпти, Қозоғистон маҳсулотини тайёрлашга ҳаракат қиляпти, ёш қизлар, аёлларни иш билан таъминлаяпти. Эҳтимол улар ишлаб чиқарган маҳсулот жаҳон брендлари даражасида эмасдир, бироқ кийса бўлади», — деди Қозоғистон президенти.

Айни вақтда, Назарбоев «Қозоғистонда ишлаб чиқарилган» тамғаси остидаги ҳар бир маҳсулот рақобатбардош бўлиши учун товарлар учта талабга жавоб бериши — сифатли, чиройли ва арзон бўлиши кераклигини тан олди. «Фақат шундагина бизнинг ишимиз даромадли, маҳсулотларимиз эса талабгир бўлади», — деди Қозоғистон президенти.

Назарбоевнинг қайд этишича, чет элда «миллиардерлар ўз бойлиги билан мақтанмайди, у ердаги аёллар катта тошларни тақиб юрмайди, одамлари катта машиналар ҳайдамайди». «Бизда эса одамлар тўрт қаватли уйлар қуриб, танкдек машиналар сотиб оляпти. Машина ўзи нимага керак? Бирор жойга қулай етиб олишга фақат. Шунинг учун фуқароларимиз бадавлат бўлишни ўрганишлари керак. Бойлик ва ҳокимият ҳеч кимга бахт келтирмайди, жаҳондаги барча файласуфлар, агар сенинг бойлигинг халқ фойдаси учун хизмат қилса ва бундан миннатдорлик кўрсанг, ҳақиқий бахт шу, деб айтади», — деди Қозоғистон президенти.

«Пулларингизни чет элда яширманг, ҳозир ҳатто Швейцария ҳам ҳисоб-рақамларни очиб беряпти. Ҳаммаси очиқ кўриниб қолади ва фақат Қозоғистонда қонунийлаштирилган пулларингиз қонуний маблағингизга айланади. Уларни хусусийлаштириш объектлари учун сармоя сифатида киритинг», — деди Нурсултон Назарбоев бадавлат қозоғистонликларга мурожаат қиларкан.