Жанубий Корея разведкаси КХДР раҳбари Ким Чен Ин ўтган ҳафтада Япон денгизи соҳилидаги Вонсан портига ташриф буюриб, сувости кемасидан баллистик ракетанинг муваффақиятсиз учирилишини шахсан кузатганини даъво қилмоқда. Корея Республикаси давлат разведка агентлиги директори Ли Бён Хо мазкур мавзудаги маърузасини 30 ноябрь, душанба куни тақдим этди, дея хабар беради «РИА Новости».
Ушбу хулосалар Шимолий Корея матбуотининг Ким Чен Ин 27 ноябрь куни Вонсандаги пойафзал фабрикасини бориб кўргани ҳақидаги хабарларига асосланган. Разведканинг таъкидлашича, эртасига, 28 ноябрь куни Шимолий Корея Вонсан яқинида, Япон денгизида баллистик ракетани учиришга ҳаракат қилган, бироқ парвоз муваффақиятсиз якунланган. Буни Ким Чен Ин шахсан кузатган.
2015 йил 8 майда илк бор Шимолий Корея сувости кемасидан баллистик ракета учирилиши ҳам мамлакат раҳбари кузатуви остида ўтган, ўшанда ракета 150 метрга кўтарилиб, сўнг пастга қулаганди. Бу гал эса ракета сув юзасига ҳам чиқолмаган.
Изоҳ (0)