Нидерландия полицияси Украинада ҳалокатга учраган Малайзия «Боинг»ига алоқадор буюмларни сотишда гумон қилиб, ўз ходимини қўлга олди, дея хабар бермоқда «Корреспондент.net».
Тартиб посбони Marktplaats таниқли эълонлар сайтида барча истовчиларга бундай «эсдалик совғалари»ни таклиф қилган. Полициячи ўз лавозимини суиистеъмол қилиш орқали қўлга киритилган мол-мулкни ўзлаштириш ва сарф қилишда гумонланиб ҳибсга олинди.
Сотувга қўйилган буюмлар орасида «Боинг» ҳалокати сабабларини текширган ходимларнинг махсус кийимлари, «Малайзия ҳаво йўллари» логотипи туширилган сочиқчалар ва «номаълум материалнинг бир бўлаги» бўлган. Баъзи маълумотларга кўра, харидорларга самолёт бўлаклари ҳам таклиф қилинган.
Айни пайтда ушбу буюмлар ҳақиқатан ҳам самолётга тегишли-тегишли эмаслигини аниқлаш бўйича ички тергов олиб борилмоқда. Бундан ташқари, прокуратура жиноий текширувни бошлаган.
Эслатиб ўтамиз, 2014 йил 17 июль куни Malaysia Airlines’нинг Амстердамдан Куала-Лумпурга учиб кетаётган «Боинг-777» лайнери Украинанинг Донецк вилоятида қулаган эди. Самолёт бортида бўлган 298 кишининг барчаси ҳалок бўлган.
Изоҳ (0)