Яман президенти Абду Раббо Мансур Ҳодий икки ойлик танаффусдан сўнг ватанига қайтди. Бу ҳақда Al Jazeera телеканалига таяниб, «ТАСС» хабар бермоқда.
«Президент Ар-Риёддан (Саудия Арабистони пойтахти) Аданга (Яманнинг «вақтинчалик» пойтахти) йўл олди. У Тоизни исёнчи хусийлардан озод қилишда иштирок этади», — дея таъкидлаган бир неча ойдан бери жанглар тинмаётган Тоиз шаҳри ҳарбий қўмитаси раҳбари.
Мансур Ҳодий олдинги гал Яманда қурбон ҳайити кунлари бўлган ва шундан сўнг БМТ Бош Ассамблеясида иштирок этиш учун Нью-Йоркка жўнаб кетган. Ўшанда мамлакат ташқи ишлар вазири Риёд Ёсин давлат раҳбари барқарор бўлмаган вазият туфайли Ар-Риёдга қайтишга мажбур бўлганини билдирганди.
16 ноябрь куни ҳукумат тарафдорларидан иборат кучлар Тоиз ва унинг атрофида кенг кўламли ҳужум бошлагани маълум бўлди. Саудия Арабистони бошчилигидаги араб коалицияси томонидан ёрдам етиб келгани бунга имкон берган.
Изоҳ (0)