Париждаги терактлар туфайли қидирувга берилган Салоҳ Абдусаломнинг акаси Муҳаммад Брюсселда айблов эълон қилинмай қўйиб юборилди. Бу ҳақда RTL телеканалига таяниб, «РИА Новости» хабар бермоқда.
«Муҳаммад Абдусалом 16 ноябрь, душанба куни тонгда айблов эълон қилинмай қўйиб юборилган. Бу маълумот ҳозирча прокуратура томонидан тасдиқланмади», — дея маълум қилган телеканал эксперти.
Ушбу маълумотни ҳибсга олинганнинг адвокати Натали Галлан тасдиқлади. «Мижозим 36 соат ушлаб турилиб, сўнг айблов эълон қилмай қўйиб юборишди. Бу эса унинг ҳеч қандай айби йўқлигини англатади. Муҳаммад оилали, унинг икки нафар фарзанди бор. Гарчи ўзаро қариндошлик хусусидаги маълумотлар тўғри бўлса-да, Муҳаммад одатий ҳаёт тарзини кечирган», — дея таъкидлаган адвокат.
Муҳаммад Абдусалом 14 ноябрь, шанба куни Брюсселдаги Моленбек коммунасида қўлга олинганди. Унинг укаси Салоҳ Францияда қидирувга берилган. Яна бир укаси — Иброҳим эса Париждаги терактлар чоғида Voltэр хиёбонида ўзини портлатиб юборган.
Изоҳ (0)