Ўзбекистон Республикаси Олий Мажлиси Қонунчилик палатасининг навбатдаги мажлиси бўлиб ўтди. Унда депутатлар бир қатор қонун лойиҳаларини кўриб чиқди. Бу ҳақда палата ахборот хизмати хабар берди.
Парламент қуйи палатаси аъзолари «Электрон ҳукумат тўғрисида»ги Ўзбекистон Республикаси қонуни лойиҳасини биринчи ўқишда кўриб чиқди. Муҳокама жараёнида мазкур қонуннинг қабул қилиниши «электрон ҳукумат» тизимини жорий этишнинг асосий йўналишларини аниқ белгилаш, давлат бошқаруви органлари фаолиятининг самарадорлиги, шаффофлиги ва очиқлиги даражасини оширишга кўмаклашиши таъкидланди. Унда электрон ҳукумат тизимларини ривожлантиришда сезиларли натижаларга эришган АҚШ, Германия, Австрия, Корея Республикасининг тажрибаси ҳисобга олинган.
Депутатлар Хўжалик процессуал кодекси, Бюджет кодекси, шунингдек, «Суд ҳужжатлари ва бошқа органлар ҳужжатларини ижро этиш тўғрисида»ги Қонунга ўзгартиш ва қўшимчалар киритишни назарда тутувчи қонун лойиҳасини кўриб чиқди. Ушбу соҳани ҳуқуқий тартибга солишни янада такомиллаштириш мақсадида қонун лойиҳасида ижро варақаси ёки ижро ҳужжати кучига ҳам эга бўлган суд буйруғини судьянинг рақамли электрон имзоси билан тасдиқланган электрон ҳужжат тарзида юбориш назарда тутилмоқда. Қонун лойиҳасининг қабул қилиниши суд ишларини юритиш тезкорлигини ошириш, суд харажатлари, ижро ҳужжатининг ижрога қаратилиши вақти қисқартирилиши, шунингдек, АКТ қўлланилишининг кенгайишига кўмаклашади.
Мажлис давомида депутатлар Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисидаги бир қатор қонун лойиҳаларини ҳам кўриб чиқди.
Изоҳ (0)