Футбол бўйича Ўзбекистон миллий терма жамоаси 12 ноябрь, пайшанба куни ЖЧ—2018 ва Осиё Кубоги—2019 саралаш баҳслари доирасида навбатдаги ўйинини ўтказади. Тошкент вақти билан 18:00 да «Пахтакор» марказий стадионида бошланадиган учрашувда Самвел Бабаян қўл остидаги ўзбекистонликларга «H» саралаш гуруҳи пешқадами — Шимолий Корея терма жамоаси рақиб бўлади. ЎФФ матбуот хизмати мазкур ўйин олдидан ташкил этилган расмий машғулотларидан фоторепортаж тайёрлади.
Ўзбекистон миллий терма жамоаси 2015 йил ҳисобидан учинчи, ўз тарихида эса саккизинчи марта Шимолий Кореяга қарши тўп суради. Аввалги етти учрашувнинг биттаси 1998 йилги Осиё ўйинлари, яна бири 2015 йилги Осиё Кубоги доирасида, иккитаси ўртоқлик учрашуви мақомида, қолган учтаси эса жаҳон чемпионати саралаш баҳслари доирасида ўтказилган.
ЖЧ—2018 саралаши доирасида 16 июнь куни Пхеньянда бўлган сўнгги ўйин алоҳида эътиборга молик. 4:2 ҳисобида якунига етган баҳс КХДРнинг Ўзбекистон устидан қозонган илк ғалабаси сифатида тарихда қолди. Айни вақтда, айнан мана шу ўйин Миржалол Қосимовнинг миллий терма жамоадаги мураббийлигининг иккинчи даврига якун ясади — учрашув биринчи таймидан кейин Ўзбекистоннинг 0:4 ҳисобида ортда боргани мухлисларни айниқса ғазаблантирган эди.
Қосимов истеъфосидан сўнг миллий терма жамоа рулини қўлга олган «Пахтакор»нинг собиқ бош мураббийи Самвел Бабаян жамоа билан кетма-кет учта ғалабага эришди. Дастлаб Тошкентда Яман 1:0 ҳисобида, сўнг меҳмонда Филиппин (5:1) ва Баҳрайн (4:0) йирик ҳисобларда мағлуб этилди. Мазкур ғалабалардан сўнг миллий терма жамоа, бир ўйин захирасига эга бўлгани ҳолда, гуруҳда иккинчи ўринга кўтарилди. Эътиборли томони, саралашнинг «иккинчи давра»сида Ўзбекистон, Шимолий Кореядан ташқари, Филиппин (2016 йил 24 мартда) ва Баҳрайнни (2016 йил 29 мартда) Тошкентда қабул қилади, уйда эса «деворлар ҳам ёрдам бериши» аниқ.
Кетма-кет ғалабалар, айниқса, 2005 йилдан бери Ўзбекистон учун кутилмаганда «ноқулай рақиб» мақомини олган Баҳрайн устидан эришилган ишончли ҳам йирик ғалаба нафақат терма жамоага ташқаридан бўлган ишончни, терма жамоа ичида — футболчиларнинг ўзига бўлган ишончини ҳам оширди. «Аввалги ўйиндаги мағлубият учун ўч олиш мақсадида эмас, фақат уч очко ниятида майдонга тушамиз. Ортиқча эҳтиросга берилиб эмас, ақл билан ўйин кўрсатамиз», — дейди 12 ноябрдаги ўйин арафасида ўз фикрлари билан ўртоқлашган терма етакчиларидан бири Азиз Ҳайдаров.
Бабаян Шимолий Кореяга қарши ўйин учун 23 нафар футболчини танлаб олган бўлиб, уларнинг 9 нафари легионерлардир. «Биз Шимолий Кореяни кўп бора мағлуб этганмиз, бу жамоани мағлуб этиш мумкин», — дейди Жанубий Кореянинг «Улсан» клубида тўп сурувчи Сервер Жепаров. «КХДР дарвозасига гол уриш қийин, деган гапларга қўшилмайман. Йўқ, қийин эмас», — дейди сўнгги вақтларда терма жамоанинг ишонган ўйинчисига айланган, айни вақтда Қатарнинг «Ал-Жайиш» клубида ўйнаётган Сардор Рашидов.
Шимолий Корея бош мураббийи Ким Чанг Бок Тошкентдан дуранг билан қайтиш ҳам қониқарли эканини айтиб ўтди. Самвел Бабаян эса Шимолий Корея билан ўйинга тўрт ҳужумчини чақирган бўлиб, учрашув арафасида ташкил этилган матбуот анжуманида бўлажак ўйинда ҳам бир ҳужумчи билан ўйинни бошлашини маълум қилди. Ҳужумчилардан бири — тажрибали Александр Гейнрих КХДРнинг кучсиз томонларидан хабардорлигини билдирган бўлса, ёш ҳужумчи Элдор Шомуродов Бабаян бошлиқ мураббийлар танлаган тактика ғалабага асос бўлишини, «Пахтакор» ҳужумчиси Игорь Сергеев эса имкони борича фақат мухлисларни хурсанд қилиш учун ўйнашини маълум қилди.
Аввалроқ, Ўзбекистон ва КХДР терма жамоалари ўртасидаги учрашувни Алиризо Фағоний бошлиқ ҳакамлар бригадаси бошқариб бориши маълум бўлганди. 6 ноябрдан ўйин чипталари сотувга чиққани, марказий секторларнинг 15 минг сўмлик чипталари ўйинга уч кун қолганида стадион кассаларида қолмагани ҳақида ҳам хабар берилган эди.
Изоҳ (0)