«Реал» (Мадрид) ва Португалия терма жамоаси ҳужумчиси Криштиану Роналду шахсий ҳаётидаги баъзи жиҳатлар, хусусан, 5 ёшли ўғли Криштианинью билан муносабатлари ҳақида The Times ва Kicker нашрларига сўзлаб берди, дея ҳикоя қилади «Stadion.uz».
«25 ёшга кирганимда ота бўлишни истай бошладим ва шундай бўлди ҳам. Ёлғиз отаман. Дунёда онасиз ўсаётган фақат менинг ўғлим эмас, отасиз ўсаётган болалар ҳам кўп. Мен ҳеч қачон ҳеч кимга ўғлимнинг қандай қилиб ер юзида пайдо бўлиб қолгани, унинг онаси кимлиги ҳақида айтиб бермайман. Фақат унинг ўзигагина улғайганида бор гапни етказишим мумкин. Мен унга барчасини тушунтираман, ўз бошимдан қандай ҳиссиётлар кечирганим ҳақида айтаман. Менимча, у буни тўғри қабул қилади», — дейди футболчи.
«Ўғлимнинг туғилиши ҳаётимни ўзгартириб юборган. У ҳамиша кулиб юради ва менга ҳамиша далда беради. Мен унинг ҳам футболчи бўлишини, у ҳам мен босиб ўтган йўллардан юриб, ҳужумчи сифатида кучли жамоаларда ўйнашини истайман. Лекин у ҳозирча дарвозабон бўлишга рўйхушлик билдирмоқд», дея маълум қилган Роналду.
Дунёдаги энг кўп пул ишлаб топувчи Роналду тарбия бобида анча қаттиққўллигини ва бу жараёнда тартиб ҳукм суриши керак, деб ҳисоблашини айтади. «Фарзандларнинг тарбияси осонлик билан бузилиб кетиши мумкин. Агар сен кичкина бўлиб катта кароватда ётсанг, болаликдан тўкин-сочин ҳаёт кечирсанг, нонуштага ҳар сафар ёгурт ва мевалар истеъмол қилсанг, жуда эрка бўлиб ўсасан. Ўғлим анча олдинроқ, унга iPhone 6s сотиб олиб беришимни сўраганди. Мен дарҳол унга «йўқ!» деганман. У эса илтимосини такрорлаб, телефон унга мен билан гаплашиши учун керак бўлишини айтганди. Мен эса унга «бунга зарурат туғилса, бувисидан мен билан боғлаб беришини сўраши кераклиги»ни айтганман. Уни доим назорат қилиб тура олмасман, лекин уни яхши тарбия қилишни истайман ва бу унинг учун энг керакли совға бўлади», дейди ота Роналду.
Ўз навбатида, у ўғлини овқатлардан умуман тиймаслигини аён қилган. «Ҳар якшанбада биз бу борада ўзимизга эрк берамиз ва бургер еб, кока-кола ичиш учун йўл оламиз. Лекин меъёрга амал қилган ҳолда», дея аниқлик киритади футболчи.
Эслатиб ўтамиз, 2010 йилда Криштиану Роналду ўғилли бўлгани ҳақида маълум қилганди. Унинг биологик онаси ҳақида аниқ маълумотлар йўқ. Роналду ўз автобиографиясида ўғлининг онаси ҳақида ҳеч қачон ҳеч кимга маълумот бермаслигини таъкидлаб ўтган.
Матбуотда бу масала билан боғлиқ турли миш-мишлар юради. Улардан бирига кўра, Криштианинью АҚШда суррогат она орқали дунёга келган ва Роналду бу амалиёт учун 20 миллион доллар сарфлаган.
Изоҳ (0)