4 ноябрь, чоршанба кечки пайт Покистоннинг Лаҳор шаҳридаги пластик пакетлар ишлаб чиқарувчи Plastic Industries фабрикаси биноси қулаши оқибатида қурбонлар бўлганлар сони 20 кишидан ошди. Ҳодиса содир бўлганда тўрт қаватли фабрикада 150 дан зиёд ишчи бўлган. Бу ҳақда Лаҳор полицияси вакили Муҳаммад Усмон маълум қилган, дея хабар беради «ТАСС».
«20 дан ошиқ кишининг жасади топилди, 85 киши қутқарилган, кўпчилик вайроналар остида қолган. Жабрланганлар касалхоналарга ётқизилди, улардан 15 кишининг аҳволи оғир. Қутқарув ишларига 300 дан ортиқ одам, шунингдек, муҳандислик қўшинлари жалб этилган», — дея таъкидлаган Муҳаммад Усмон.
Маълумотларга кўра, нобуд бўлганлар орасида фабрика эгаси Муҳаммад Ашраф, шунингдек, 10 ёшгача бўлган болалар ҳам бор. Маҳаллий аҳолининг айтишича, фожиага 26 октябрда рўй берган ва 272 нафар покистонликни ҳаётдан олиб кетган зилзила туфайли фабрика биносида пайдо бўлган ёриқлар сабаб бўлиши мумкин. Корхона раҳбарияти уларни кўрмасликка олган ва шикастланган пойдевор устида фабрика юқори қаватларини барпо қилишда давом этган.
Эслатиб ўтамиз, олдинроқ мазкур ҳодисада 10 киши нобуд бўлгани билдирилганди.
Изоҳ (0)