Мисрда қулаган A321 лайнери ташқи таъсирга учрамаган, учувчи эса самолёт радарлардан йўқолишидан аввал ҳеч қандай носозлик ҳақида ахборот бермаган. Бу ҳақда, «РБК»нинг маълум қилишича, «қора қутилар»ни ўрганиш бўйича дастлабки хулосалардан бохабар манбага асосланиб, Reuters агентлиги хабар бермоқда.
Агентликнинг ҳодиса юзасидан тергов ҳаракатларини олиб бораётган Миср масъулларига асосланиб хабар беришича, самолёт ташқи таъсирга учрамаган.
Аввалроқ Москвада ташкил этилган матбуот анжуманида Metrojet («Когалимавиа») авиакомпанияси раҳбарияти самолётнинг ҳавода ишдан чиқишининг фақат битта аниқ изоҳи борлиги, яъни, ҳаво кемасига ташқаридан таъсир кўрсатилганини маълум қилганди.
«Самолёт ҳавода бузилиб кетишига сабаб бўладиган носозликнинг ўзи йўқ. Мазкур ҳолатда самолёт ердан берилган зарба оқибатида бузилиб кетган. A320 — жуда ишончли самолёт, унинг тизими учувчи қўпол хатога йўл қўйган вақтда ҳам катта юкламаларга чиқишга имкон бермайди», — деди Metrojet бош директорининг парвозларни ташкил этиш масалалари бўйича ўринбосари Александр Смирнов.
Metrojet авиакомпаниясининг Шарм-аш-Шайхдан Санкт-Петербургга учаётган Airbus A321 лайнери 31 октябрь, шанба куни Мисрнинг Эл-Ариш шаҳридан 100 километр узоқликда қулади. Самолёт бортида бўлган барча 224 киши (217 йўловчи ҳамда экипажнинг 7 аъзоси) ҳалок бўлди.
Халқаро авиация қўмитаси (ХАҚ) экспертларининг фикрича, самолёт катта эҳтимол билан ҳаводалигидаёқ бузилиб кетган. ХАҚ ижрочи директори 1 ноябрь куни берган баёнотида самолёт бўлаклари 20 квадрат километр майдонга сочилиб кетганини маълум қилганди. «ТАСС» манбаларининг айтишича, лайнер ҳавода ёниб кетган.
Metrojet’нинг техник директори Андрей Аверянов эса 2 ноябрь, душанба куни бўлиб ўтган матбуот анжуманида A321’нинг дум қисмида ҳақиқатан ҳам авиаҳалокатга қадар бузилган жой борлигини тасдиқлади. Маълум бўлишича, лайнер ҳали Ливаннинг Middle East Airlines авиакомпаниясига тегишли бўлган 2001 йилда қўниш вақтида дум қисмини учиш-қўниш йўлагига уриб олган.
Изоҳ (0)