Шимолий Қозоғистонда аёл ёнаётган уйдан икки ва тўрт ёшли болаларни олиб чиқишга муваффақ бўлди, деб ёзади Kazakhstan Today.
26 октябрь куни Г. Мусрепов тумани Чистополье қишлоғидаги ёнғин постига хонадонлардан биридан тутун чиқаётгани, ичкарида ёш болалар борлиги ҳақида хабар келиб тушди. Бироқ ўт ўчирувчилар воқеа жойига бориб, уйдан ҳеч кимни топа олмади.
Кейинроқ маълум бўлишича, хонадондаги ёнғин белгиларини қўшни аёл сезиб қолган, у ичкарига кириб, икки ёшли қизалоқ ва тўрт ёшли ўғил болани навбат билан ташқарига олиб чиққан. Сўнг аёл уйдаги газ баллонини ҳам судраб чиқарган ва ёнғин бўлимига қўнғироқ қилган.
Ёнғин бартараф этилди, у болалар гугурт билан ўйнагани туфайли келиб чиққан бўлиши мумкин. Хабар берилишича, бу пайтда болаларнинг отаси ишда бўлган, онаси бироз вақтга ишлари билан кўчага чиқиб кетган.
Изоҳ (0)