Нью-Йоркдаги Aloft Manhattan Downtown меҳмонхонасида янги хизмат кўрсатиш тизими жорий этилди. The Daily Mail хабарига кўра, энди мижозлар у ёки бу хизматни сўраб, меҳмонхона хизматчиларига маълум бир смайл-эмодзилар билан SMS йўллаши мумкин.
Бунинг учун меҳмонхонада махсус Text it, Get it дастури ишлаб чиқилган. Хона рақами, меҳмоннинг шарифи ва эмодзилар кетма-кетлигини териб, SMS йўллаш орқали олтита турли хизмат тўпламларини буюртириш мумкин.
Масалан, ичкиликбозликдан кейинги бошоғриқдан азият чекаётган меҳмонхона ташрифчилари сув томчиси, ҳапдори ва банан тасвирини хизматчиларга йўллаб, қиймати 10 долларлик Hangover тўпламидан фойдаланиши мумкин — ундан икки шиша сув, бошоғриққа қарши дори ва икки банан ўрин олган.
Шунингдек, Re:Fresh тўплами ёрдамида тиш чўткаси, паста, устара, соқол олиш учун крем ва дезодорантга эга бўлиш мумкин. Sightseer тўплами эса 10 доллар эвазига метрога йўл чиптаси, шаҳар харитаси ва меҳмонхона баридан икки ичимлик ичиш ҳуқуқини беради.
Ҳозирги вақтда мазкур хизмат фақатгина Нью-Йоркдаги Aloft Manhattan Downtown меҳмонхонасида мавжуд. Бироқ тез орада АҚШнинг бошқа штатларидаги, шунингдек, Европа ва Осиёдаги меҳмонхоналарда ҳам ушбу хизматлар жорий этилиши режалаштирилган.
Изоҳ (0)