Ўнинчи «Тоғ-кон иши – Mining World Uzbekistan – 2015» халқаро кўргазмаси доирасида «Ўзгеоинвест – 2015» Ўзбекистон Республикасининг қаттиқ фойдали қазилма бойликларини ишлаб чиқариш ва қазиб олиш бўйича инвестиция салоҳиятига бағишланган халқаро конференция ўтказилди. Бу ҳақда Ўзбекистон Ташқи ишлар вазирлиги матбуот хизмати хабар берди.
Унинг Ўзбекистон Республикаси Давлат геология ва минерал ресурслар қўмитаси томонидан ташкил этилган тақдимотида мамлакат геология тармоғида амалга оширилаётган ислоҳотлар ва инвестиция лойиҳалари, Ўзбекистондаги конлар ҳақида атрофлича маълумот берилди.
Конференцияда мутахассислар таъкидлашича, Фойдали қазилма бойликлар захиралари давлат баланси маълумотлари бўйича, 2015 йил 1 январь ҳолатига кўра, республикада 1838 та кон очилган, шуларнинг 950 таси ёки 52 фоизи мустақиллик йиллари ҳиссасига тўғри келади.
Конференция доирасида инвесторлар эътиборига 540 та қаттиқ фойдали қазилмалар кони тақдим этилди, уларнинг базасида ички ва ташқи бозорда талабгир бўлган кенг турдаги маҳсулотлар ишлаб чиқарувчи корхоналар яратиш мумкинлиги таъкидланди.
Изоҳ (0)