Исроил бош вазири Биньямин Нетаньяхунинг сўзларига кўра, 1941 йили фаластинликлар етакчиси — Қуддус муфтийси Ҳаж Амин ал-Ҳусайний нацистлар Германияси доҳийси Адольф Гитлерни яҳудийларни қиришга илҳомлантирган. Нетаньяхунинг бу сўзларига 21 октябрь, чоршанба куни БМТда кескин муносабат билдирилди, дея хабар бермоқда «ТАСС».
«Яҳудийларга нисбатан Холокостни бошлашга [Гитлерни] фаластинликлар, мусулмонлар ёки нацистлардан бошқа биров илҳомлантириши мумкинлиги ҳақидаги барча тахминлар ақлга сиғмайди», — деди БМТ бош котиби расмий вакили ўринбосари Фархан Ҳақ. Унинг сўзларига кўра, бу каби фикрлар «кескинликни юмшатишга ёрдам бермайди».
Ҳақнинг қайд этишича, БМТ бош котиби Пан Ги Мун Исроил ва Фаластинга амалга оширган ташрифи чоғида «барча сиёсий, жамоат ва диний етакчиларни иғвогарликларга қарши чиқишга» чақирган эди. «БМТ бош котиби бу даъватни қайтаришда давом этади», — деди халқаро ташкилот вакили.
Нетаньяхунинг кўплаб мамлакатлар жамоатчилиги томонидан кескин кутиб олинган фикрлари 20 октябрь, сешанба куни Қуддусда бўлиб ўтган Сионистларнинг 37-конгресси вақтида янграган эди.
«Ал-Ҳусайний Берлинга учиб борган. Ўша вақтда Гитлер яҳудийларни қириш истагида бўлмаган, у фақат яҳудийларни қувғин қилмоқчи эди. Ал-Ҳусайний эса Гитлернинг ёнига бориб: ‘Агар сен уларни ҳайдасанг, улар Фаластинга келади’, — деган. ‘Уларни нима қилишим керак?’, — деб сўраган Гитлер. Ал-Ҳусайний шундай деган: ‘Уларни ёқиб юбор’».
Исроил бош вазирининг сўзларини унинг ҳамюртлари ҳам кескин кутиб олди. Хусусан, мухолифатдаги «Сионистлар лагери» партияси раҳбари Исхоқ Герцог бош вазирдан «айтган сўзларини зудлик билан қайтариб олишни» талаб қилди, ҳукмрон «Ликуд» партияси бўйича Нетаньяхунинг сафдоши ҳисобланган Исроил мудофаа вазири Моше Яалон тарихнинг бундай талқин қилинишини танқид остига олди. «Яҳудийлар масаласини тугал ҳал қилиш ғоясини ал-Ҳусайний ўйлаб топмаган», — деди у.
Изоҳ (0)