Тошкентлик профессионал алоқа ходими Алексей Тудаков Тошкент ҳаётининг бир кунини акс эттирувчи таймлапс видеони суратга олди. Алексей Facebook’даги саҳифасига жойлаган видеога изоҳ сифатида ушбу лойиҳани яратишга қарийб икки ой вақт кетганини, бу унинг биринчи тажрибаси эканлигини қайд этди.
«Дарё» мухбири саволларига жавоб берар экан, Алексей ушбу видеони яратишда Минск шаҳри ҳақидаги таймлапс техникасида яратилган роликдан илҳом олганини таъкидлади.
«Видеони бир неча сабабларга кўра олдим. Ажойиб шаҳримиз гўзаллигини ўзим учун кадрга муҳрламоқчи бўлдим. Иккинчи сабаби — хорижликлар ва потенциал сайёҳларга намойиш этиш учун. Ҳеч қачон Тошкентни кўрмаган кўплаб кишилар уни тасвирлаб беришимни сўрайди. Бу, менимча, Тошкент қандайлигини кўрсатишнинг энг яхши усули. Учинчи сабаби шуки, чет элга кетган дўстларим Тошкентнинг суратларини сўрайди, энди улар Тошкентни кўриб, соғинчини қондириши мумкин», — дея лойиҳадан кўзлаган мақсадларини бирма-бир ошкор этди муаллиф.
Маълумот учун, таймлапс — бу узоқ вақт давомида қўзғалмас ёки равон ҳаракат қилувчи камера ёрдамида олинган суратлар кетма-кетлигидан яратилган видео. Натижада «тезлаштирилган съёмка» ҳосил бўлади, унда бутун кун бир жойга йиғилиб, икки дақиқага «жойланади».
Изоҳ (0)