Криштиану Роналду тўртинчи бор «Олтин бутса»ни қўлга киритиб, рекорд ўрнатди

Испания чемпионатининг ўтган мавсумида жами 48 та тўп киритган Мадриднинг «Реал» фубол клуби ҳужумчиси Криштиану Роналду Европа миллий чемпионатларининг энг яхши тўпурарига бериладиган «Олтин бутса»ни тўртинчи бор қўлга киритиб, ўзига хос рекорд ўрнатди. «Барселона» ҳужумчиси Лионель Месси бу мукофотга уч марта лойиқ кўрилган, дея хабар беради «ТАСС».

Роналду бунгача 2007—2008 йиллар («Манчестер Юнайтед», 31та гол) ҳамда 2010—2011 йиллар мавсумида («Реал», 40 та гол) мазкур мукофотни қўлга киритган эди.

2013—2014 йиллар мавсумида 31 тадан тўп киритган икки футболчи — Роналду ҳамда ўша пайтда «Ливерпуль» сафида ўйнаган Луис Суарес совринни ўзаро бўлишиб олган.

Эслатиб ўтамиз, «Олтин бутса» мукофоти 1968 йилдан бери Европа чемпионатларининг энг яхши тўпурарига топшириб келинади.