«Бавария» Карло Анчелотти билан икки йиллик шартнома борасида келишиб олди

Германиянинг «Бавария» футбол клуби италиялик мутахассис Карло Анчелотти билан икки йиллик шартнома борасида келишиб олди. Бу ҳақда «ТАСС» хабар бермоқда.

Sport Mediaset хабарига кўра, Анчелотти 2015/2016 йилги мавсум якунига кўра, «Бавария»нинг ҳозирги бош мураббийи — испаниялик Хосеп Гвардиоланинг ўрнини эгаллайди. Гвардиоланинг ўзи эса «Манчестер Сити»га йўл олиши кутилмоқда.

Анчелотти 2015 йилнинг 25 май куни Мадриднинг «Реал» жамоаси бош мураббийлигидан кетган эди. Мадрид клуби билан биргаликда у Испания Кубоги, УЕФА Суперкубогини қўлга киритган, Европа Чемпионлар лигаси ва клублар ўртасидаги жаҳон чемпионатида ғолиб чиққанди.

Анчелотти мураббий сифатида энг кўп совринларини 2001—2009 йиллар оралиғида Италиянинг «Милан» жамоасида қўлга киритган. Унинг қўл остида миланликлар Европа Чемпионлар лигасида, Италия чемпионатида, клублар ўртасидаги жаҳон чемпионати, Италия Кубоги, Италия ҳамда УЕФА Суперкубогида зафар қучган.

Шунингдек, италиялик мутахассис Англиянинг «Челси» ва Франциянинг «ПСЖ» жамоаларига ҳам устозлик қилиб, мазкур мамлакатлар миллий чемпионатлари ғолиблигини қўлга киритган.