АҚШ президенти Барак Обама Орегон штатининг Роузбург шаҳридаги коллежда юз берган отишма оқибатида вафот этганларнинг қариндошлари билан учрашди. Бу ҳақда «Zakon.kz» хабар бермоқда.
Мазкур учрашувдан сўнг журналистлар олдида чиқиш қилган президент АҚШ маъмурияти бу каби ҳолатлар такрорланишининг олдини олиш учун чоралар кўриши зарурлигини маълум қилди.
«Оммавий отишмаларни қандай қилиб тўхтатиш мумкинлигини тушуниб олиш учун биз бирлашишимиз лозим», — дея қисқача фикр билдирди Обама. Айни вақтда, АҚШ президентининг қўшимча қилишича, бу кун, энг аввало, ҳалок бўлганларнинг оилалари ҳақида қайғурмоқ керак.
Эслатиб ўтамиз, Роузбург шаҳридаги Umpqua Community College коллежи ҳудудида юз берган отишма оқибатида тўққиз киши ҳалок бўлган. Ўқотар — 26 ёшли Крис Харпер-Мерсер ўз жонига қасд қилган.
Гувоҳларнинг сўзларига кўра, Мерсер одамларни ўлдиришидан аввал улардан қайси динга эътиқод қилишини сўраган ва фақат насронийларни отиб ташлаган.
Қайд этиш жоиз, биргина 9 октябрнинг ўзида АҚШ коллежларида юз берган отишмалар натижасида икки киши — бири Аризона университетида, иккинчиси Хьюстондаги Жанубий Техас университети ётоқхонасида ҳалок бўлди.