Сноуден Буюк Британия махсус хизматларини смартфонларга хакерлик ҳужуми уюштиришда айблади

АҚШ Миллий хавфсизлик агентлиги собиқ ходими Эдвард Сноуден BBC телеканалига берган интервьюсида Буюк Британия ҳукумат алоқалари бошқармаси (GCHQ)да фойдаланувчиларни хабардор қилмасдан смартфонларга ҳужум қилиш учун зарур воситалар борлигини маълум қилди, деб ёзади «Ведомости».

Бунинг учун улар мобил телефонга шифрланган матнли хабар юбориши кифоя, шундан сўнг махсус хизматлар атрофда бўлаётган барча нарсани эшитиш ва тасвирга олиш имконини қўлга киритади. Жосуслик хабарининг ўзи эса абонент учун кўринмас бўлади.

«Махсус хизматлар кимга қўнғироқ қилаётганингиз, нима деб хабар ёзганингиз, қайси сайтларга кирганингиз, қаерларда бўлганингиз, телефонингиз қандай симсиз алоқа тармоқларига уланганини кўра олади», — деди Сноуден.

GCHQ бу айбловларга изоҳ бермади. Британия ҳукумати вакили «разведка хизматлари билан боғлиқ масалаларни изоҳламаслиги»ни, «GCHQ’нинг бутун фаолияти эса қатъий ҳуқуқий режим доирасида олиб борилиши»ни таъкидлади.

Эдвард Сноуден билан боғлиқ можаро 2013 йил июнида келиб чиққан эди. Ўшанда у АҚШ махсус хизматлари интернет ва мобил алоқа орқали бутун дунёдаги фойдаланувчиларни кузатиб боргани ҳақидаги махфий ахборотларни фош этган эди.