2015 йилнинг 29 сентябрь куни Алишер Навоий номли Ўзбекистон Миллий кутубхонасига Япония ер, инфратузилма, транспорт ва сайёҳлик вазирининг парламентдаги ўринбосари Кейсуке Сузуки бошчилигида Япония делегацияси ташриф буюрди. Ташриф доирасида меҳмонларга Симпозиумлар саройи ва Миллий кутубхона бўйлаб таништирув экскурсияси уюштирилиб, унда Ўзбекистон Миллий кутубхонасининг фаолияти, имкониятлари ва ривожланиш истиқболлари ҳақида сўзлаб берилди. Бу ҳақда Ўзбекистон Миллий кутубхонаси матбуот хизмати хабар бермоқда.
Ташкил этилган экскурсия давомида Ўзбекистон Миллий кутубхонаси директори ўринбосари У.Тешабаева кутубхонанинг қурилиш тарихи ва ҳозирги фаолияти, фойдаланувчилар учун яратилган шарт-шароитлар, электрон базани яратиш жараёнида қўлланиладиган илғор информацион технологиялар, Миллий кутубхонанинг халқаро алоқалари ҳақида маълумот берди.
Кутубхона бўйлаб қилинган экскурсия чоғида меҳмонлар китоб музейи, кўргазмалар, мультимедия ва электрон залларни кўздан кечирди. Меҳмонлар «Жаҳон» залида ташкил этилган Миллий кутубхона фондларида сақланувчи япон китоблари кўргазмасини юксак баҳолади.
Делегация аъзолари қўлёзмалар, нодир ва алоҳида қимматга эга нашрлар бўлимига ҳам ташриф буюрди. Бу ерда улар қадимий литографик ва босма нашрлар, хариталар, ҳатто, япон тилидаги ноёб китоблар билан ҳам танишди.
Япония ер, инфратузилма, транспорт ва сайёҳлик вазирининг парламентдаги ўринбосари Кейсуке Сузуки меҳмонлар китобида ўз таассуротларини қолдирди ва кутубхонанинг янада ривожланишига тилак билдирди. Ташриф сўнгида Сузукига Ўзбекистон Миллий кутубхонаси томонидан эсдалик совғаси тақдим этилди.
Изоҳ (0)