Ўзбекистоннинг тўққизта тижорат банки 2014 йил якунларига кўра, активлар ҳажми бўйича МДҲнинг 200 та йирик банклари рўйхатига кирди, дея хабар бермоқда UzDaily. Рўйхат Россиянинг «РИА Рейтинг» рейтинг агентлиги томонидан тузилди.
Ўзбекистон Республикаси Ташқи иқтисодий фаолият миллий банки 5,3 миллиард доллар активлари билан Топ-200 нинг 43-поғонасига жойлашди. Ушбу банк активларининг 2014 йилдаги ўсиш даражаси 3,4 фоизни ташкил қилди. Ўзсаноатқурилишбанкнинг активлари 3,23 миллиард доллар деб баҳоланди ва 61-ўринга муносиб кўрилди. 2014 йилда банк активлари 4,1 фоизга ўсган.
Рейтингнинг 86-поғонасидан ўрин олган «Асака» банкининг активлари 2,17 миллиард долларга тенг бўлиб, 2014 йилда унинг активлари 5,6 фоизга кўпайган.
Шунингдек, Ўзбекистонда фаолият юритувчи Қишлоқ қурилиш банки (1,41 миллиард доллар, 122-ўрин), Ипотека банк (активлари 1,35 миллиард долларга тенг, 126-ўрин), Халқ банки (1,23 миллиард доллар, 133-ўрин), Агробанк (1,18 миллиард доллар, 136-ўрин) ҳам МДҲдаги етакчи банклар рейтингига кирган.
Бундан ташқари, рейтингга КДБ Банк (0,87 миллиард доллар, 162-ўрин), Ҳамкорбанк (0,72 миллиард доллар, 191-ўрин) биринчи марта киритилди.
Эслатиб ўтамиз, ўтган йили ушбу рўйхатдан Ўзбекистондаги еттита банк ўрин олган эди.
Изоҳ (0)