2015-yilning 29-sentabr kuni Alisher Navoiy nomli O‘zbekiston Milliy kutubxonasiga Yaponiya yer, infratuzilma, transport va sayyohlik vazirining parlamentdagi o‘rinbosari Keysuke Suzuki boshchiligida Yaponiya delegatsiyasi tashrif buyurdi. Tashrif doirasida mehmonlarga Simpoziumlar saroyi va Milliy kutubxona bo‘ylab tanishtiruv ekskursiyasi uyushtirilib, unda O‘zbekiston Milliy kutubxonasining faoliyati, imkoniyatlari va rivojlanish istiqbollari haqida so‘zlab berildi. Bu haqda O‘zbekiston Milliy kutubxonasi matbuot xizmati xabar bermoqda.
Tashkil etilgan ekskursiya davomida O‘zbekiston Milliy kutubxonasi direktori o‘rinbosari U.Teshabayeva kutubxonaning qurilish tarixi va hozirgi faoliyati, foydalanuvchilar uchun yaratilgan shart-sharoitlar, elektron bazani yaratish jarayonida qo‘llaniladigan ilg‘or informatsion texnologiyalar, Milliy kutubxonaning xalqaro aloqalari haqida ma’lumot berdi.
Kutubxona bo‘ylab qilingan ekskursiya chog‘ida mehmonlar kitob muzeyi, ko‘rgazmalar, multimediya va elektron zallarni ko‘zdan kechirdi. Mehmonlar “Jahon” zalida tashkil etilgan Milliy kutubxona fondlarida saqlanuvchi yapon kitoblari ko‘rgazmasini yuksak baholadi.
Delegatsiya a’zolari qo‘lyozmalar, nodir va alohida qimmatga ega nashrlar bo‘limiga ham tashrif buyurdi. Bu yerda ular qadimiy litografik va bosma nashrlar, xaritalar, hatto, yapon tilidagi noyob kitoblar bilan ham tanishdi.
Yaponiya yer, infratuzilma, transport va sayyohlik vazirining parlamentdagi o‘rinbosari Keysuke Suzuki mehmonlar kitobida o‘z taassurotlarini qoldirdi va kutubxonaning yanada rivojlanishiga tilak bildirdi. Tashrif so‘ngida Suzukiga O‘zbekiston Milliy kutubxonasi tomonidan esdalik sovg‘asi taqdim etildi.
Izoh (0)