Бугун, 24 сентябрь куни Мино водийсида жойлашган Жамарот — Шайтонга тош отадиган жойга олиб борувчи ва ундан қайтиладиган йўлда, ҳожиларнинг тирбандлиги натижасида одамлар бир бирларини беҳос сиқиб ташаш ҳолати вужудга келди, деб хабар беради Дин ишлари бўйича қўмита матбуот хизмати.
Натижада, Саудия Арабистони фуқаро муҳофазаси хабарларига кўра, 453 киши ҳаётдан кўз юмди, шунингдек, 719 киши жароҳатланди.
Саудия Арабистонида ўзбекистонлик ҳожиларга хизмат кўрсатувчи ишчи гуруҳ берган маълумотга кўра, ҳодиса юз берган пайтда ўзбекистонлик ҳожилар Муздалифа водийсидан Минога қайтаётган эди. Ўзбекистонлик ҳожилар ҳеч қандай талофат кўрмади, барчалари соғу саломат ва ибодатларини давом эттирмоқда.
Эслатиб ўтамиз, 11 сентябрь куни Маккадаги Ал Ҳарам масжидига кран қулаши натижасида 107 киши ҳалок бўлган. Аммо у ҳодисадан ҳам ўзбекистонлик зиёратчилар жабрланмаган эди.
Изоҳ (0)